Zwei Jahre nach Shakespeares Geburt brachte Thomas Rebart 1566 in Frankfurt das Buch „Koch- und Kellermeisterei“ heraus. Hier ein paar ausgewählte Rezepte – am besten laut gelesen.
Würst von Fischen.
Schüp vnd hack sie klein/ stoß in einem Mörser/ thu Würtz vnd Saltz darzu/ füll die därm/ vnd seud sie ab als mit Wein/ mach ein Pfefferlin dran.
Küchlin von Krebsen.
Nim Krebs/ seud sie mit Wasser vnd Saltz/ schele sie schön/ Nim die Hels/ Scheren vnd Schwentz/ Mehl/ Saltz vnd Würtz/ hack sie schön/ bestreich die Hend inwendig mit Honig/ vnd welge die Tüchlin zusamen/ gilb ein Teiglin/ vnd zeuch die Küchlin durch/ Back sie braun/ gib sie trucken/ oder in eim Ziselin/ gibst du sie trucken/ so bestrew sie mit Zucker.
Nicht vergessen: Feist essen ist ungesund!
All feist essen sind dem Menschen schad/ vnd die feisten Fisch noch schedlicher. So ist Brot trucken gessen auch schedlich. Wil aber der Mensch Keß vnd Brod essen/ der thu es nicht vngetruncken.
Gut Kirschenmus.
Brich die stiel ab/ stos in eim Mörser mit Kern vnd al/ Nim Feigen/ Rosin auff ein Essen/ weiche weis Brotschnitten in Wein/ Temperier es durch einander/ streich es durch ein Tuch mit anderm Wein/ mach es nicht zu dick/ noch zu dünn/ thu ein steublin Mehl vnd Butter darein/ zertreib es wol in einer Pfann/ richt es an dieweil es seudt wie ein ander Muß/ thu lauter Schmaltz vnd Würtz darauff/ trags also für.
Roter Wein zimpt besser darzu denn weisser/ rüre es wol bis es geseud/ so müset es sich/ vnd stehet wol.
Besonders köstlich klingt der Lummelbraten (?) vom Hirsch.
Hirschen Lummelbrahten.
Nim den Schweis/ reib Lebkuchen drein/ treibs durch ein Tuch in ein Hafen/ thu ein wenig Essig drein. Wil der Schweis nicht gern durchgehen/ geus Wein oder Fleischbrüh dran/ treibe den Lebkuchen vnd Schweis durch/ die nieren vnd schlaffbrähtlin wol gewaschen/ schneids würfflet drein/ las sieden/ meng es mit Saltz vnd schwartz Würtz.
Vielleicht lieber die vegetarische Option?
Kuglechte Eyer.
Klopff Eyertotter/ gerieben Semmelbrot/ Muscaten vnd Saltz/ machs durch einander/ füll die Eyerschalen damit/ stürtze ein güpfflin von einer anderen Eyerschalen/ innen mit Eyerklar gesalbet/ vber das löchlin des gefüllten Eyes/ röst sie in Buttern/ braht oder seud sie. Solche füll mag man in Krebsschalen füllen/ Peterlin vnd ander gute Kreuter darein hacken/ mit Würtzen vnd Saltz abgemacht. Gib es in einem Brühlin/ oder trucken.
Nichts für Damen sind selbstverständlich die
Klein Krapffen für Herrn.
Klein Krapffen für Herrn füll mit eitel Fischlebern/ wol gestossen mit ein wenig gerieben Lebkuchen/ so haben sie Würtz gnug. Also Vogellebern/ Hünerlebern wol gehackt vnd gestossen/ mit einem Eyertotter/ vnd gerieben Lebkuchen daran/ vnd füll sie ein.
Darf’s was Gesundes sein? Eine Renaissance-Salsa!
Gut grün Salsen von Kreutern.
Klaub Pfefferkraut/ Beimenten/ Mangolt/ Ampffer/ streiff die stiel dauon/ darnach weich weis Brot/ Essig oder Wein/ reib Lebkuchen/ Stosse alles mit den Kreutern gar wol/ treib es mit Essig vnd Wein/ darinnen das Brot geweicht durch ein Tuch/ mache es ab mit würtz/ behalt sie in einem Gläsin Hafen/ mit Deckel.
Zum Drüberstreuen noch ein paar weise Worte …
Vom Biber.
Der Biber ist ein Thier/ wie ein Meerhund/ lang vnd schwanger/ hat sehr lange Zeen/ er mag nicht lang leben/ er hab dann den Schwantz im Wasser/ dann er ist halb Fleisch/ vnd das ander theil am Schwantz ist Fisch/ der Schwantz ist etwan einer Elen lang/ vnd hat viel fettigkeit in jm/ hat hinden Füss wie ein Gans/ die fördern als ein Hund. Solchs hat jm die Natur geben/ das er hinden wie ein Fisch im Wasser schwimmet/ vnd mit den förderen wie ein ander Thier gehen mag.
Des Bibers Hoden abgeschnitten/ vnd an ein dunckele statt auffgehencket/ vnd behalten zu der Artzney/ genandt Castorium/ das sein die Biberhoden/ die sein gut wider den fallenden Siechtag des Haubts/ wider den Schlag der Zungen/ sein Pulffer gelegt vnter die Zung/ daruon es zergehet vnd verstöret wird. Es benimpt auch das stechend Bauchwehe mit Essig getruncken/ vnd vertreibt die blest im leibe/ bringt der Frawen Zeit/ vnd dringt aus die ander Geburt.
Sonst noch Fragen?
Aus dem Buch:
Koch vnd Kellermeisterey/ von allen Speisen vnd Getrencken/ viel guter heimlicher Ku:enste/ auch wie man Salsen/ Confect/ Conseruen/ vnd Einbeytzungen machen/ von mancherley Früchten/ Blumen/ Kreutern vnd Wurtzelen. Einem jeden im Hauß gar notwendig vnd nützlich zu gebrauchen.
Gedruckt zu Franckfurt am Main/ Durch Thomam Rebart/ Anno M.D.LXVI.
Quelle: https://www.uni-giessen.de/fbz/fb05/germanistik/absprache/sprachverwendung/gloning/tx/kochkell.htm